ЯГЛІКІ АЛЬБО ПЛЯЦКІ З ПШОНКІ

коўшык 46

Хто такія яглі?

Гэта старадаўняя назва кашы з проса, якую ведалі нават у 19 стагоддзі. З проса варылі поліўкі на малацэ ці яглі елі з мясам. Сёння пра проса мы крыху забылі. Але я настойліва буду вас заахвочваць есці кашы. Нудна, скажаце вы. Лухта! З кашаў можна зрабіць усё што заўгодна. Сёння зробім аладкі з проса – добры перакус падчас працы ці падвячорак для дзяцей.

Яглікі я раблю тады, калі ў мяне засталася каша з учора.

патрэбна:

2 шклянкі гатаванага проса

яйка

вяленыя памідоры (ці морква)

соль

перац

дробка куркумы

2–3 лыжкі вотруб’я

рапсавы алей

соус:

100 г натуральнага ёгурту

2 лыжачкі хрэну

дробка солі

У місцы змешваем усе складнікі. Я дадала для смаку вяленыя памідоры, але спакойна можна замяніць іх старкаванаю моркваю. Залежыць ад таго, што маеце ў лядоўні. Аладкі фармуем рукамі ды смажым на рапсавым алеі. Важна: алеем трэба толькі трошкі змазаць патэльню, аладкі не мусяць плаваць у тлушчы. Памятайце, у кожнай лыжцы алею – каля 90 калорыяў, таму тлушч варта мінімізаваць. Калі алей пераліць у бутэльку з распыляльнікам, расход будзе меншы.

Смажым аладкі на патэльні да залатога колеру. Падаем з соусам, які вельмі лёгка зрабіць: проста змяшаем інгрэдыенты. Смачна есці!