МОРКВА НА ГАРНІР

коўшык 47
ПАМАРАНЧАВЫЯ І ТУТ, І ТАМ!

Цяпер морква стала хутчэй дадаткам да іншых страваў. Прапаноўваю сёння ўзнесці яе на п'едэстал. І так, на абед – катлеткі з морквай і гарнір з морквы – на французскі манер. Крыху павараная морквачка – вельмі смачная і з поспехам можа замяніць традыцыйную бульбу. Да таго ж яна больш карысная (вітаміны А, В1, В2, В6, Е плюс кальцый, жалеза, медзь, фосфар і пекцін) ды менш каларыйная (толькі 35 ккл у 100 г). Паводле дыетолагаў, штодня трэба імкнуцца есці 5 порцыяў гародніны. У нашых умовах гэта даволі складана, але давайце зробім першы крок.

Патрэбна на катлеты:

паўкілі фаршу з цяляціны

1 цыбуліна (старкаваная)

1 морквіна (старкаваная на дробнай тарцы)

1 яйка

соль

перац

на гарнір:

прыкладна па 2–3 морквіны на асобу

вяршковае масла

соль

цукар

шкурка цытрыны

чабор

на соўс:

100 г ёгурту натуральнага ці смятаны

2–3 лыжачкі хрэну

соль

У місцы змешваем усе інгрэдыенты на катлеты. Калі фарш занадта густы, можна дадаць яшчэ адно яйка, калі рэдкаваты – некалькі лыжак вотруб'я. Добра замешваем і фармуем невялікі катлеткі. Можна смажыць на патэльні на алеі, а можна запячы ў духоўцы (атрымаюцца сухаватыя, але здаравейшыя).

Моркву скрабем, кроім лустачкамі па дыяганалі, прыкладна па паўсантыметра. Гатуем з соллю і лыжачкаю цукру каля 5–7 хвілінаў. Морква не павінна разварыцца, няхай злёгку захавае цвёрдасць. І апошні крок – на патэльні 3 хвілінкі падсмажваем моркву на масле, дадаем чабор і старкаваную шкурку цытрыны.

І яшчэ адзін сакрэт. Морква вельмі любіць хрэн, гэта значыць, што добра спалучаецца з ім смакам. Таму да абеду зробім лёгкі соус з хрэнам: змяшаем ёгурт і некалькі лыжак старкаванага хрэну, пасолім.

Цяпер выкладаем на талерку і завем сямейнікаў! Смачна і здорава вам есці!