СВЯТОЧНЫЯ ПЕРНІКІ ПАВОДЛЕ ВОЛІ ГАРДЗЕЙЧЫК


коўшык 25
НАЙЛЕПШАЯ ЗАБАВА Ў КУХНІ



Перад святамі абавязкова зрабіце пернікі! З сябрамі ці з дзеткамі. Праца вельмі творчая і смачная. А які пах ва ўсім доме!.. Трэба зарэзерваваць прынамсі 3 гадзіны і вызваліць вялікі стол для працы. Гатовыя пернічкі паскладайце ў слоікі, каб так і захоўваліся да Калядаў. Хоць цяжка ўтрымацца і не з’есці іх раней.

патрэбна:
500 г мукі
пачак прыправы для пернікаў
350 г мёду
75 г масла
лыжачка соды

на ўпрыгожванне:
шакалад
какосавыя стружкі
пялёсткі мігдалу
мак
эмэмдэмсы
каляровыя пасыпкі

У муку насыплем прыправы для пернікаў, а калі няма, то з хатніх – карыцы, гваздзікоў, крышанку кмену і лаўровага ліста, лыжачку соды і паўшклянкі цукру. Уліем слоік мёду, дадамо чвэрць пачка масла. Замяшаем рукамі на стале. Цеста – крохкае, будзе рассыпацца, але гэта нічога, мясіце далей. Галоўнае, каб не клеілася да рук, дадавайце пакрысе муку.




Дошку пасыплем мукой, адрэжам ад цеста невялікі кавалак, раскатаем яго і выражам пернікі. Бляхі памажам маслам і пасыплем мукой або засцелем пергамінам і выкладзем пернічкі.


 Пекчы будзем у разагрэтай (!) на 180 градусаў духоўцы каля 15 хв., лепш недатрымаць, чым ператрымаць, бо мёд хутка цямнее. Здымаем цёплыя, асцярожна, па адным, нажом, бо крохкія і паломяцца.  Раскладзем на роўнай паверхні. Калі астынуць, паліем шакаладам ці джэмам. На цёплы шакалад дзеці ўжо самі разбяруцца, што прыклеіць, пастаўце толькі перад імі сподачкі з эмэмдэмсамі, разынкамі, гарэшкамі і г. д. Смачна есці!




Popular Posts