КАРПАЧЧА З БУРАЧКОЎ НА ПЯРЫНЕ З РУКАЛЫ

коўшык 24

НАВАТВОРЫ Ў КУХНІ

Калі думаеш пра бурак, то адразу згадваеш боршч, селядзец пад футрам ды іншыя салаты з маянэзам. Я ж вельмі люблю новае прачытанне старых і любімых прадуктаў. Сёння пачаруем над бурачком. Раней змяшчала ў блогу салат з буракамі, малінамі і казіным сырам. Сённяшні рэцэпт працягне гэтую тэму. Бурачковае карпачча – эфектная закуска, якая вельмі спадабалася маім гасцям. Зрабіць яе можна за 5 хвілінаў, калі замарынаваць буракі напярэдадні.

Патрэбна:

3 прыблізна аднолькавыя буракі

аліўкавы алей

чабор

палова цытрыны

1 зубок часныку

рукала

пялёсткі мігдалаў

сыр фета

Буракі памыем і зварым. Пачакаем, каб астылі (я выстаўляю рондаль на гаўбец). Абярэм (памятай пра гумовыя пальчаткі, каб не пафарбаваць пальчыкі). Пакроім на тоненькія лустачкі. Перакладзем у міску, дадамо 50 г аліўкавай алеі, сок з паловы цытрыны, соль, чабор і здробнены зубок часныку. Міску закрыем і пакінем у лядоўні прынамсі на ноч. За гэты час бурачкі набяруць смаку.

Перад тым, я падаць на стол, на вялікую талерку выкладзем рукалу (ці нейкае іншае зялёнае лісце) – няшмат, толькі каб пакрыць паверхню. Наступны слой – бурачкі. Тут трэба пастарацца зрабіць прыгожа. Паліем марынадам, які застаўся ў місцы. Цяпер снежны акцэнт: сыр фета разамнем пальцамі на невялікія кавалачкі і размесцім зверху бурачкоў. Мігдалавыя пялёсткі злёгку падсмажым на патэльні, каб яны сталі залацістыя і хрусткія, ды пасыплем імі карпачча. Страва лёгкая і элегантная, выдатна пасуе да кілішка чырвонага віна. Смачнага вечара!