ЯЙКІ ПА-ГУБЕРТАЎСКУ

коўшык 16

Наш адказ  Бэнэдыкту

Яйкі ў кашульках, або яйкі па-бэнэдыктаўску ўражваюць самых спакушаных гурманаў. І падаюцца вельмі складанымі ў выкананні. Калі ў мяне госці, і трэба зрабіць эфектны сняданак, то рыхтую менавіта гэтую сакрэтную зброю. Мой рэцэпт розніцца ад класічнай версіі тым, што ён фітнэс. Замест белай булкі – чорны хлеб, замест бекону – ласось і без тлустага галандскага соусу. Вадкае золата жаўтка, што разліваецца па талерцы, – самы цудоўны дадатак! Нічога болей не патрэбна.

P. S. Гэтая версія дызайнерскіх лусценяў прысвячаецца Лёшы Мінчонку!

А вось што патрэбна:

4 яйкі

50 г (можна болей) вэнджанага ласося

2 лусты чорнага хлеба

2 ліскі салаты

тваражок

1 памідор

воцат

пармезан (неабавязкова)

Прапаноўваю спачатку падрыхтаваць усе складнікі канапкі. Хлеб падсмажыць у тостары, намазаць тваражком. Зверху ліст салаты і ласось. На ласось – кружок памідора. Калі навучыцеся гатаваць яйкі ў кашульках, усё будзеце рабіць адначасова.

Цяпер нашую раскошную вежу ўвянчаем яйкам. У рондалі закіпяцім ваду. У кіпень дадамо 2–3 сталовыя лыжкі воцату. Цяпер чары-мары! Яйка разаб’ем у невялікі кубачак. Ваду замяшаем у адным кірунку, каб утварылася варонка, і хуценька ў яе уліваем яйка. 

Яно гатуецца хвіліны тры. Бялок павінен зварыцца, а жаўток застацца вадкім. Асцярожна вымаем вялікаю лыжкай. Я выкладаю спачатку у міску і закрываю накрыўкай – каб было даўжэй цёплае. Такім самым чынам варым наступнае яйка. Калі ўсе яйкі гатовыя, выкладваем іх на лусцені. Можна для балаўства зверху пасыпаць цёртым пармезанам ці іншым сырам. Смачна есці!