ВЕЛЬМІ ЗЯЛЁНАЯ САЛАТА З КУРАЙ

коўшык 10

ЛЕТНІ ЛАНЧ-ТАЙМ

Салаты – пэўна, найбольш адпаведная форма абеду ўлетку. Спрыяюць гэтаму спякота і багацце рознакаляровых вітамінных бомбаў проста з гароду. У салатах я асабіста люблю нечаканыя спалучэнні смакаў і фактураў. Сёння прапаноўваю страву лёгкую, але вельмі сытную і смачную. Салата атрымалася ў мяне зялёная, аднак дастатковая для абеду нават вялікага мужчыны.

Патрэбна:

лісткі салаты (я выкарыстала рукалу)

2 гуркі

кальрабі

гарэшкі кеш’ю

пелькі (курыныя грудкі)

соль

перац

чабор

на дрэсінг:

50–70 г аліўкавага алею

лыжка мёду

лыжка гарчыцы

Добра разагрэем патэльню-грыль, літаральна 3 хвілінкі пасмажым кеш’ю. Патэльню змажам аліўкавым алеем. Курку паперчым, пасолім і будзем смажыць з чаборам недзе 10 хв. з кожнага боку, каб стала залацістая, але не высахла ўсярэдзіне.

Лісткі салаты памыем. Рукалу рэзаць не трэба, а вось звычайную салату лепш парваць на меншыя шматкі. Гуркі і кальрабі накроім саломкаю.

Усе складнікі дрэсінгу змяшаем. Падказка: для гэтага найлепш выкарыстаць невялікі слоік з накрыўкаю. Ён дзеіць як адмысловая прылада для кактэйляў, шэйкер, – вельмі зручна трэсці і змешваецца ўсё ідэальна.

На вялікую талерку выкладзем спачатку лісткі салаты, потым гуркі і кальрабі, на ўсё гэтае – яшчэ цёплую парэзаную курыцу. Паліем дрэсінгам і пасыплем гарэшкамі. Смачна есці!