БРУСКЕТА З БАЗІЛІКАМ

сонечны сняданак

коўшык 4

Летні сняданак на балконе стаў рэальнасцю. Апрача зялёнай гарбаты і смажаных яек зрабіла брускету з базілікам. Гэта адзін з відаў італьянскай закускі. 2 лютага ў горадзе Спэллё (Spello), што ўва Умбрыі (Umbria), нават адзначаюць свята – Sagra de la bruschetta. Ёсць безліч варыянтаў таставанага хлеба з дадаткамі (з аліўкамі, каперсамі, анчоўсамі, гарэхамі, пармезанам, мацарэлай і нават крэветкамі). Найбольш люблю менавіта гэты – самы просты і смачны, прапаноўваю пачаць з яго, а потым смела эксперыментаваць.

Патрэбна:

белы хлеб (чыяабата, багет або нават звычайны лаваш)

2 вялікія памідоры

жменя лісткоў базіліку

аліўкавая алея

чорны перац

соль

часнык

Вядома, найлепш смакуюць добра саспелыя памідоры. Іх і трэба парэзаць невялікімі кубікамі. Пасекчы базілік. Усе змяшаць, паліць аліўкавай алеяй (некалькі сталовых лыжак), пасаліць і паперчыць. Добра было б, каб прынамсі 5–10 хвілінаў страва пастаяла і смакі спалучыліся. Хлеб пакроіць на лусты таўшчынёю прыкладна 1 см, падсмажыць у тостэры ці ў духоўцы. Калі не ідзяце на працу, можна нацерці часныком. На хлеб выкласьці памідоры. І не трэба чакаць – спажываць адразу і з апетытам! Смачна есці!