ПА-ПЕРШАЕ, ХАЛАДНІК


ЧАС ПРЫГАДАЦЬ НАЙЛЕПШЫ СМАК ЛЕТА

коўшык 3

Нарэшце дачакалася свежай гародніны. Калі на вуліцы горача, для мяне найлепшая ежа – халаднік. Крыху змадыфікавала версію, якую мы звычайна рабілі з маці і бабуляй, яна без мяса і больш аксамітная, дзякуючы кефіру і смятане. Рэцэпт просты, але трэба зрабіць загадзя, каб да абеду паспеў астыць.



Патрэбна:

пучок свежых буракоў з бацвіннем
воцат
соль
500 мл натуральнага ёгурту ці кефіру
5 лыжак смятаны
5 радысак
2 сярэднія гуркі
крыху зялёнай цыбулькі і кропу
колькасць вараных яек залежыць ад колькасці спажыўцоў (1 яйка на асобу)

Бурачкі з лісцем вельмі добра памыць, бацвінне парэзаць на кавалачкі па сантыметры, бурачкі падзерці на тарцы (бурачковай). Заліць невялікай колькасцю вады і гатаваць 10–15 хв, пры канцы дадаць соль і 2 лыжкі воцату, каб захаваць цудоўны колер. Набрацца цярплівасці – астудзіць. Дадаць кефір і смятану. Гурок і радыску падраць на бурачковай тарцы і таксама засыпаць у халаднік. І тры кропкі над “і”: яйка, кроп і свежая цыбулька. Смачна есці!






Popular Posts