МАЗУРКА НА ВЯЛІКДЗЕНЬ

коўшык 119

ЗАБЫТЫЯ ТРАДЫЦЫІ

Мазурка – традыцыйнае печыва на Вялікдзень з крохкага цеста. Упрыгожваюць яго глазурай, варанай сгушчанкай, шакаладам, сочывам ці арэхамі. Варыянтаў безліч. Кожнаму на густ і смак.

Калісьці мазурка была традыцыйным ласункам падчас Вялікадня, цяпер мазуркі можна сустрэць у суседняй Польшчы. Цікава, што ў нас мазурка жаночага роду, а ў палякаў – мужчынскага. Мазурэк і мазурка.

Рэцэпт банальна просты, але эфектоўны. Мне падаецца, што ягоны смак будзе больш адпавядаць дарослым. Какосавая мазурка выдатна пасуе да філіжанкі моцнай кавы.

патрэбна:

200 гр. какосавых габлюшак (стружак)

70 гр. масла

50 гр. цукру

200 гр. горкага шакаладу

200 мл. вяршкоў 30%

Замешваем рукамі какос, цукар і масла. Цеста гладкім не будзе – не пераймайцеся. Форму абавязкова выкладваем пергамінам і лепім нашую мазурку з невялікімі борцікамі. Пячэм каля 15 хвілінаў у тэмпературы 160 градусаў. Мазурка павінна быць залацістай, але пільнуйце, каб на падгарэла.

Вяршкі ў рондлі падагрэем і здымаем з агню. Шакалад паламаем на кавалкі. Засыпаем шакалад у цёплыя вяршкі і мяшаем. Атрымаецца густы моцна шакаладны крэм. Заліваем шакалад у гатовую мазурку і пакінем на ноч, каб застыла. Цудоўных вам велікодных сняданкаў!