ДУХМЯНЫ ТАЖЫН З КУС-КУСАМ

коўшык 114
БЕЛАРУСКА-МАРАКАНСКАЕ СЯБРОЎСТВА



Кмен, куркума і імбір... Мараканскія кірмашы запоўненыя духмянымі спецыямі. А які пах у паветры! Гандляры прадаюць ружовую ваду і арганавы алей. Шумна, шматлюдна і маляўніча... Марока!
Самая славутая мараканская страва – гэта тажын. У адмысловым гліняным начынні на вогнішчы нават некалькі гадзінаў тушыліся самыя смачныя кавалкі. Сапраўдны слоў фуд) Традыцыйны тажын робяць з ягняцінай, але я дадаю сюды беларускі акцэнт – кавун. Так паўстала беларуска-мараканскае сяброўства. Дарэчы, выдатная страва для сустрэчы з сябрамі, а калі крыху застанецца, то можна смела ўзяць з сабой у ланч-бокс на працу.

патрэбна:
700 гр. гарбуза
1 вялікая морква
1 папрыка
1 цыбуля
300 гр. зяленай фасолькі (у мяне была замарожаная)
10 штук курагі
1 шклянка таматнага соўсу
па дробцы прыправаў (кмен, вострая папрыка, чорны перац, куркума, імбір, карыца)
какосавы алей (ці рапсавы) для смажэння
соль
лыжачка цукру

300 гр. кус-кусу
жменя разынак
скурка з цытрыны
соль
1 лыжка алею
пятрушка ці кінза для дэкарацыі
арахіс для дэкарацыі

Прыправы падсмажваем на патэльні на алеі. Гэта дапаможа адкрыць пахі і смакі. Цяпер дадаем пакроеную цыбульку і смажым да залатога колеру. Дадаем кавалкі морквы і смажым хвілін 5. Потым чарга кавуна, папрыкі, фасолі і курагі. Заліваем усё таматным соўсам, солім і цукрым, тушым пакуль уся гародніна стане мяккай. Калі соўс стаў вельмі густым, то дадайце крыху вады.

Пакуль тушыцца тажын зробім кус-кус. У кашу дадаем разынкі, скурку з цытрыны, соль і лыжку алею. Заліваем кіпнем на сантыметр вышэй, накрываем покрыўкай і пакідаем да 5 хвілін. Потым трэба толькі раздрабніць відэльцам.


Падаем кус-кус з тажынам, пасыпаем кінзой і арэхамі. Смачных вам сустрэчаў!




Popular Posts