СЛІМАКІ СА ШПІНАТАМ

коўшык 108

ІДЭАЛЬНАЯ ЗАКУСКА Ў ГОСЦІ

Цяпер цудоўны сезон, калі мы найчасцей наведваем блізкіх і сяброў. З пустымі рукамі прыходзіць не выпадае... Не пакупаць жа торт у краме? Канешне не. І хто сказаў, што гэта мусіць быць салодкае?

Складнікі:

упакоўка слоенага цеста (нам жа трэба хутка)

упакоўка замарожанага шпінату

3 зубкі часныку

2 лыжкі сметанковага масла

100 гр. сыру фэта

соль

перац

мускатны арэх

кунжут

Спачатку робім начынне. Можна нават напярэдадні, тады ўвесь далейшы працэс зойме 15 хв.

На масле ў рондлі падсмажым кавалачкі часныку. Дадамо замарожаны шпінат. Падгатуем пад покрыўкай, каб размарозіўся. Здымем покрыўку і дадамо сыр кавалачкамі, соль, перац і мускатны арэх. Цяпер паспрабуйма ці смакуе, калі не, то трэба яшчэ прыправіць. І гатуем яшчэ хвілін 5. Важна, каб не былп шмат вады.

Цеста раскатаем, вылажым шпінат, скруцім рульку. Парэжам на кавалачкі ў 2-3 см. Пашмаруем яйкам і пасыпем зярняткамі кунжуту. Пячэм у тэмпературы 180 градусаў каля 12 хвілін. Смачных вам сустрэчаў!