БУРАКОВА-ПЯРЛОВЫ ЛАНЧ-БОКС

коўшык 104

МАЕ ПРЫЗНАННЕ Ў КАХАННІ... БУРАКАМ

Я ведаю чаму большасць аматараў гатавання не любяць буракі... Доўга гатаваць ды яшчэ рукі пэцкаць... Ды і смак нічога цікавага. Але я буракі люблю, нягледзячы на ўсё гэта. А смак? Проста трэба ведаць з чым яго пажаніць :) у бонусе такі прыгожы восеньскі колер...

А сённяшні рэцэпт робіцца хутка, галоўнае, папярэдне зварыць бурак і кашу.

патрэбна:

шклянка гатаванай пярлоўкі

гатаваны бурак

100 грамаў казінага сыру ці брынзы

жменя арэхаў

крыху аліўкавага алею

цытрына

жменя разынкаў

соль

перац

рукала

Разынкі замочваем у гарачай вадзе на 5 хвілінаў. Бурак і сыр кроім квадрацікамі. Змешваем з пярлоўкай. Дадаем разынкі. Паліваем 2 лыжкамі алею, сокам з чвэрці цытрыны і добра мяшаем. Калі бярэм на працу, то рукала ідзе на гару, а калі ў хаце, то ўніз. Пасыпаем падпражанымі на патэльні арэхамі. Смачна есці!