ВЕРАШЧАКА З ГРАЧАНЫМІ БЛІНАМІ

коўшык 95

ПАЧАСТАВАЛІ ВАРШАВЯКАЎ, ПАЧАСТУЕМСЯ І САМІ

Мачанка – адзін з сімвалаў беларускай кухні. Месцамі ўлюбёная, месцамі забытая. У кухні Вялікага княства Літоўскага ведалі яе розныя варыянты, мы ж для варшавякаў згатавалі верашчаку паводле рэцэпту каралеўскага кухмістра Верашчакі. Гэта ён недзе ў сярэдзіне XVIII стагоддзя дадаў у мачанку піва. Як кажуць легенды, яшчэ больш папулярнай страва стала ў ХIХ стагоддзі дзякуючы супадзенню назвы з прозвішчам каханай паэта Адама Міцкевіча Марылі Верашчакі.

P.S. Вялікі дзякуй Дзіме Ягораву за фотаздымкі)

Для верашчакі патрэбна:

4 белыя каўбаскі

150 гр. грудзінкі

100 гр. цыбулі

50 гр. мукі

0,5 л. піва

кмен

лаўровы ліст

перац чорны гарошак

соль

Для тонкіх грачаных бліноў патрэбна:

150-200 гр. грачанай мукі

50 гр. пшанічнай мукі

2 яйкі

малако

соль

цукар

алей для смажання

Грудзінку пакроім саломкай і падсмажым на патэльні. У вытаплены тлушч дакінем дробныя кубікамі цыбулю і падсмажым да залацістага колеру.

Тым часам каўбаскі адварым у піве са спецыямі. Гатовыя пакроім кавалачкамі. Піўны бульён працэдзім і дадамо цыбулю, скваркі ды каўбаскі.

На сухой патэльні падсмажым муку да крэмавага колеру, астудзім і развядзем паловай шклянкі халоднага булёну да аднароднай кансістэнцыі. Гэтую сумесь тонкім струменьчыкам, увесь час памешваючы, уліем у верашчаку з каўбаскамі і потым на павольным агні падгатуем да загусцення. Падаем з грачанымі блінамі. Смачна есці!