ПЛЯЦКІ СА СЛІЎКАМІ

коўшык 20

Фіялетава-карычнЕВы НАСТРОЙ

Аладкі могуць быць не толькі з яблыкамі. Хоць мая мама рабіла менавіта такія, я, разгортваючы тэму, замяняю звыклыя яблычкі на чарніцы, маліны, а цяпер, увосень, – слівы. Як базу выкарыстоўваю цеста для панкейкаў, пакуль лепшага не знайшла J Калі ведаеце, то абавязкова падзяліцеся са мной!

патрэбна:

шклянка кефіру (біфітату, ёгурту натуральнага)

1 + 1/3 шклянкі мукі

1/3 шклянкі сланечнікавага алею

2 яйкі

паўлыжачкі соды ці парашку для пячэння

2 лыжкі цукру

паўлыжачкі карыцы

10–15 сліваў

смятана ці ёгурт замест соусу

Усе складнікі (акрамя сліваў :)) змяшаем у блэндары. Гатовае цеста мае быць як смятана, калі занадта рэдкае – дадайце яшчэ лыжку-дзве мукі. Слівы памыем і парэжам на невялікія кавалачкі. Закінем у цеста і асцярожна перамяшаем.

Патэльню разагрэем. Дадатковага тлушчу не трэба – ён ужо ёсць у цесце. Выкладзем на патэльню лыжкаю. Будзем смажыць на сярэднім агні да залацістага колеру. Дачакаемся, пакуль на паверхні пляцкі будуць бачныя бурбалкі, і яна падыдзе – тады смела пераварочвайце і літаральна праз паўхвілі здымайце. Такія аладкі я люблю мачаць у ёгурт з карыцай.

Смачна есці!