ХАЛАДНІК НА НОВЫ ЛАД

коўшык 93

РУЖОВЫ І ПІКАНТНЫ

Калі на вуліцы так горача, гатаваць халаднік падаецца злачынствам. Але лянота – рухавік кулінарнай фантазіі, таму сёння я пайшла па шляху найменшага супраціўлення і традыцыйнаму халадніку надала больш аксамітную структуру, выразны смак і проста неверагодны колер. Ага, але бульбу ўсё ж прыйдзецца гатаваць! Бо так смакуе найлепей)

патрэбна:

3 гатаваныя буракі

800 гр грэцкага ёгурту

2 зубкі маладога часныку

соль

сок з паловы цытрыны

для ўпрыгожвання:

радыска

зялёная цыбулька

сыр фэта

Гатаваныя і абраныя буракі таркуем. Дадаем ёгурт, сок з цытрыны, часнык, соль і міксуем з дапамогай блэндара да аксамітнай кансістэнцыі. Упрыгожваем цыбулькай, радыскай і кавалачкамі фэты. Падаем моцна ахалоджаны з гарачай бульбачкай. Смачнага вам лета!