БЕЛАРУС - НЕ ТРУС! БЕЛАРУСУ - ТРУС!

коўшык 49

ТРУС У СМЯТАНЕ

Калі была маленькая, у бабулі заўсёды жылі некалькі вушастых паядальнікаў морквы, якіх я вельмі любіла падкормліваць. Сёння трусы – рэдкія жывёліны ў Беларусі, а стравы з іх мяса сталі амаль экзатычнымі. Таму варта хоць часам тлустую свініну ці курыцу з антыбіётыкамі замяніць на труса – ідэальны варыянт на нядзельны сямейны абед.
Рэцэпт старамодны, просты і смачны. Я ж яго яшчэ спрасціла. Усе на пошукі трусоў! На шчасце, далёка хадзіць не трэба, у ХХІ стагоддзі можам такое мяса лёгка знайсці праз інтэрнэт.

Патрэбны:


трус (найлепей да 1,5 кг)


200 мл смятаны


цыбуля


морква


соль


лаўровы ліст


размарын


крыху алею


пятрушка

На гарнір:


грэчка


3 вараныя ці запечаныя буракі


часнык

Трусіка памыем і раздзелім на 6–8 частак: ногі, пярэднія лапы, хрыбетнік – напалову. Крыху пасолім і паперчым далікатна. Абсмажым на алеі з абодвух бакоў да залацістага колеру. Я, каб не пэцкаць патэльні, раблю гэта адразу ў рондалі. Моркву паскрабем, абярэм цыбулю, пакроім іх адвольна і дадамо да труса. Узбагацім смак лаўровым лісцем і галінкаю размарыну. Цяпер дадамо смятаны і будзем тушыць 1-1,5 гадзіны, каб мяса стала далікатным і мяккім.
2–3 лыжкі мукі змяшаем з невялікаю колькасцю соусу ў місачцы, а потым даліем, памешваючы, у рондаль і пакінем на агні яшчэ на некалькі хвілінаў. На самы фінал пакінем зеляніну – напрыклад, пятрушку.

Грэчку зварым. Бурачкі зварым (ці запячэм) да мяккасці. Потым абярэм і пакроім на тонкія лусты. Падсмажым на масле з часныком. Падаем! Аблізваем лыжкі! Просім дабаўкі!