САЛАТА З КАВУНОМ, ФЕТАЙ ДЫ КУСКУСАМ І ПЕСТА З МЯТЫ


коўшык 38
КАВУНОВАЕ КАХАННЕ



Гэтая салата – адна з найлепшых на час спёкі і вельмі сексуальная, на маё сціплае меркаванне. Свежая, лёгкая і з арыгінальным смакам. Кавун для гэтай стравы не мусіць быць вельмі салодкі. Таму калі раптам купілі, а ён «не надта» – самае тое для нашага рэцэпту.
Кускус прыйшоў з Блізкага Усходу. Яго галоўны плюс ў тым, што не трэба варыць – «толькі дадай вады». Сама каша з цвёрдай пшаніцы мае нейтральны смак, але прыправы робяць цуды. Адно з такіх цудаў пакаштуем сёння. Небанальны варыянт на лёгкую вячэру з каханым, калі хоць есці і не хочацца, з’ядаеш усё і ледзь не вылізваеш талерку. І пасля абсалютна не адчуваеш цяжару ў страўніку, затое атрымліваеш багата энергіі.

на 2 асобы патрэбна:
палова пачкі кускусу (можна замяніць просам, але трэба будзе зварыць і астудзіць)
200 г сыру фета
чвэрць невялікага кавуна
салідная жменя ліcткоў свежай мяты
аліўкавы алей
каля 50 г фісташак
соль
перац

Кускус паліваем 2–3 лыжкамі алею, перчым, солім. Заліваем кіпнем на 2–3 см вышэй узроўню кашы і закрываем накрыўкаю.

Зробім песта. Мяту памыем. У блэндар закідваем лісткі, наліваем каля 70 г алею і ссыпаем фісташкі (без шкарлупінаў :) ). У пульсацыйным рэжыме міксуем, каб атрымалася кансістэнцыя густога соусу.

Фета асцярожна кроім даволі саліднымі кубікамі, паліваем паловай песта і пакідаем на 10 хвілінаў, каб сыр крыху замарынаваўся ў нашым духмяным соусе.

Цяпер кавун. Парэжам на даволі вялікія кавалкі – кубікамі ці адвольна, як каму падабаецца.

Кускус варта добра размяшаць відэльцам, тады ён стане больш пульхны, і дадаць некалькі лыжачак песта для смаку.


Падрыхтоўку скончылі. Выкладаем на вялікую талерку. На сярэдзіну – кускус, на яго – фета і кавун. Зверху і на бакі талеркі – яшчэ крыху песта. Я ўпрыгожыла праросткамі брокалі. Падаем з вадой з гурком і лісцікам мяты. Смачна есці! 






Popular Posts