ПІРОГ З РЭВЕНЕМ І КЛУБНІЦАМІ, ЯКІ ЗНІКАЕ НА ВАЧАХ

коўшык 33
ХУТКА І СМАЧНА ЎЗДЫМАЕ НАСТРОЙ



коўшык 33
ХУТКА І СМАЧНА ЎЗДЫМАЕ НАСТРОЙ

З калегамі з інтэрнэт-рэдакцыі дамовілася на бартэр: амерыканскі сцяг на пірог (мой сын вялікі фанат сцягоў розных краінаў). Абяцанае трэба выконваць. Гэтак у пакоі з’явіўся яшчэ цёплы пірог з рэвенем і клубніцамі ды гарэхаваю пасыпкай. Дзяўчаты тэрмінова папрасілі рэцэпт.

Патрэбна:

300 г мукі
100 г цукру (можна менш)
1,5 лыжачкі парашку для выпечкі
дробка солі
ванільны цукар
200 мл кефіру
2 яйкі
100 мл алею
200 г клубніцаў
300 г рэвеню

на пасыпку:
50 г масла
50 г мукі
50 г аўсяных шматкоў
50 г лясных гарэхаў
50 г цукру (можна з водарам мігдалу)

У адной місцы злучым усе сухія рэчывы, а менавіта муку, цукар, разрыхляльнік, ванільны цукар, соль. У другой – вадкія: кефір, яйкі ды алей, энергічна разбоўтаем лыжкаю (не міксерам). Кефірную масу выліем у сухія інгрэдыенты, усё перамяшаем – таксама лыжкаю. Цеста мае быць з невялікімі камякамі, таму асабліва не трэба старацца. Добра вымешанае цеста занадта зацвярдзее пасля выпякання.

Рэвень памыем, пакроім на кавалачкі каля 1 см, крыху прысыплем цукрам. Клубніцы пачысцім, вялікія разрэжам напалову. Цяпер зробім пасыпку. У місцы змяшаем усе складнікі ды добра разамнем рукамі.

Форму пашмаруем маслам або засцелем пергаментам (сіліконавыя і керамічныя – неабавязкова). Выкладзем цеста, наверх рэвень, клубніцы і пасыпку.

Выпякаць будзем недзе 35 хвілінаў пры 200 °С. Падаем са шклянкаю халоднага малака ці філіжанкаю кавы. Смачнага дня, калегі!

PS Фоткайце хутчэй, бо ён знікае!
здымкі Дзімы Ягорава



Popular Posts