ШАКАЛАДНЫ ПУДЫНГ

коўшык 59

ПРОСТЫ, РАЗНАСТАЙНЫ, З НІЧОГА

Пудынгі прыдумалі ў Англіі, каб крэатыўным спосабам перарабляць рэшткі ды ніхто са спажывальнікаў пра гэта не здагадаўся. Іх звычайна рабілі з яек, цукру, малака і мукі ды гатавалі на вадзяной лазні ў спецыяльнай форме (падобнай да кексніцы).

Як традыцыйная страва ангельскай кухні, пудынг часты госць у класіцы ангельскай літаратуры. У «Алісе ў Краіне Цудаў» Люіса Кэрала Алісу знаёмяць з пудынгам. Знакамітая Агата Крысці напісала серыю апавяданняў «Прыгоды каляднага пудынгу». У рамане Дзікенса «Вялікія надзеі» беднага героя прымушаюць гадзіну мясіць цеста для пудынгу. Абяцаю, у нас будзе ўсе прасцей...

У нас гэтая страва чамусьці не прыжылася, хоць раней рэцэпты былі вядомыя – ад пудынгу з лоем, вантробамі, крывёю ці капустай да мігдалавага, яблычнага ці сагавага. У крамах можна лёгка знайсці пудынг у пакетах «толькі дадай вады». Вось такі каляровы пакецік пабачыў і мой сын.

Шакаладны... А гэта значыць, што шанцаў абараніцца мала. Тады я пайшла ў наступ: давай зробім самыя, навошта нам гэтая хімія.

І мой самы дарагі мужчына пагадзіўся...

патрэбна:

500 мл. малака (можа быць таксама соевае ці мігдалавае)

1-2 лыжкі цукру

2 лыжкі какао-парашка

2 лыжкі крухмалу

жаўток (можна без яго)

какосавую стружку ці горкі шакалад для ўпрыгожвання

З усяго малака адліваем кубак, дадаем туды цукар, крухмал, какава, яечны жаўток і старанна перамяшаем. Рэшту даводзім да кіпення і тонкай крынічкай базу пудынгу ўліваем у малако. І самае галоўнае – УВЕСЬ ЧАС МЯШАЕМ, пакуль маса не набярэ адпаведнай кансістэнцыі. Пасля чаго выліваем у шклянкі ці іншую пасудзіну, дадаем шакалад ці какос. Ну і гатова. Самае складанае было пачакаць, пакуль астыне. Смачных вам пудынгаў!