САЛЕРА-ФРЫ

коўшык 48
«Сельдерей на ужин – довольна жена мужем»



Салеру часам называюць натуральнаю віяграю. «Сельдерей на ужин – довольна жена мужем». Перад рамантычным вечарам можна выпіць сок з салеры, пастарнаку і грушы. Як кажуць адмыслоўцы, пасля гэтага вашыя адносіны з супрацьлеглым полам зменяцца кардынальна. Думаю, варта паспрабаваць.

У нашай кухні не так часта сустракаем салеру, і варта сітуацыю змяніць. З гэтага караняплода можна зрабіць пюрэ, якое заменіць бульбяное. Смачная і салата з салеры, яблыка, морквы ды ёгурту. Абсалютна фантастычны смак мае паштэт з салеры (рэцэпт знойдзеце тут http://1000i1koushyk.blogspot.com/2013/05/2.html).

Але сёння падзялюся з вамі маім неверагодна простым і геніяльным адкрыццём. Салера-фры. Так! З салеры можна зрабіць замяняльнік бульбы-фры. Здаровы і смачны. Мой сын з’еў цэлую талерку, прыгаворваючы: «Я люблю салеру» – і запытаў, калі зраблю яшчэ.

патрэбна:
салера
соль
салодкая папрыка
алей рапсавы ці які заўгодна іншы


Уключаем духоўку на 160 градусаў. Рыхтаванне зойме 5 хвілінаў: салеру чысцім, кроім лустамі па паўсантыметра, а потым рэжам уздоўж доўгімі слупкамі – каб атрымаць форму бульбы-фры. У міску з салераю дадамо некалькі лыжак алею, крыху пасолім. Сюды ж адправім папрыку і перамяшаем рукамі гэтак, каб салера пакрылася алеем і спецыямі. 

Выкладзем на бляшку і пакінем у духоўцы хвілінаў на 30–40. Салера мае стаць хрусткая звонку і мяккая ўсярэдзіне. Падаем з улюбёным соусам. Я зрабіла часнычна-тварожны. Смачна есці!









Comments

Popular Posts