КУРЫНЫЯ КАВАЛАЧКІ З ГРЭЙПФРУТАВА-МАЛІНАВЫМ СОУСАМ


коўшык 23
СМачненька вітамінізуемся!




Брррр... Такое надвор’е, што падаецца, па вуліцах ходзяць толькі вірусы. Таму варта, каб на нашую талерку трапіла як мага болей вітамінаў з садавіны і гародніны. Як есці цёпла, смачна і не тлуста? На вока трапіў грэйпфрут. Вельмі здаровы і нізкакаларыйны. І вось што ў мяне атрымалася. Як сказаў мой муж, адна з найлепшых маіх страваў. Я пачырванела...

P.S. У імправізацыі галоўнае – натхненне J

Патрэбна:
2 пелькі (курыныя грудкі)
паўтара грэйпфрута
паўшклянкі малінавага соку
1 авакада
2 вялікія памідоры
соль
перац
аліўкавы алей

Спачатку парэжам пелькі на доўгія кавалкі і зробім марынад. Выціснем палову грэйпфрута, дадамо 50 г аліўкавага алею, соль, перац, чабор. Добра перамяшаем і прасочым, каб марынад пакрыў усю курыцу. Пакінем прынамсі на паўгадзіны.

Тым часам зробім салату. Авакада абярэм і пакроім кубікамі. Тое самае зробім з памідорамі. Палову грэйпфрута акуратна ачысцім ад белай скуркі і пакроім на невялікія кавалкі. Усё перамяшаем, дадамо крыху аліўкавага алею, солі і чорнага змолатага ў млынку перцу.

Патэльню-грыль добра разагрэем. Алею я не дадаю, бо ён ёсць у марынадзе. На вялікім агню будзем смажыць куру каля 5 хвілінаў з кожнага боку (час залежыць ад памеру кавалкаў). Як будзе гатовая, кавалачкі завернем у фольгу, каб адпачылі. А на патэльні (не трэба мыць пасля смажання) зробім соус: наліем малінавы сок і сок з паловы грэйпфрута ды будзем трымаць на агні, каб вадкасць пачала выпарвацца. Трэба пачакаць, каб соус стаў густым, як мёд. Урэшце гатова. Выкладайма на талеркі, і смачна есці!




Comments

Popular Posts