ЗАПЯКАЕМ ГАРОДНІНУ З ЯГЛЯМІ

коўшык 31

СТАРАЯ-НОВАЯ ЗОРКА Ў КУХНІ

– На вячэру сёння яглі.

– Якія яглі?

– Што не еўшы спаць ляглі.

Гэтак жартавалі нашыя продкі. Нам жа сёння гэтак жартаваць не выпадае, бо проса цяпер не дэфіцыт. А ў жоўтых сонечных зярнятках – ажно 10 % бялка, няма глютэну, затое ў наяўнасці крэмній, кальцый, жалеза, фосфар, калій і лецыцін. Такая каша паляпшае стан валасоў, скуры і пазногцяў, падтрымлівае рэгенерацыю суставаў, чысціць арганізм ад таксінаў, зніжае ўзровень халестэрыну. Проса падсушвае і мае антывірусныя ўласцівасці. Такім чынам, гатуйце яглі, калі прастудзіліся ці баліць горла. Хоць заклікаю не абмяжоўвацца выпадкамі хваробы, бо проса дае нам надзвычай багатыя магчымасці.

Сёння я выкарыстала баклажан, памідор і авакада, але смела гэты набор можна мадыфікаваць.

P.S. Раней падобную страву рабіла з кус-кусам, але з яглямі версія больш здаровая і смачная.

Патрэбна:

2 шклянкі зваранага проса

1 баклажан

1 авакада

1 памідор

1 морква

1 цыбуліна

рапсавы алей

смятана або гамагенізаваны сырок

мацарэла

соль

перац

куркума

Духоўку ўключым на 160 градусаў. Цыбулю пакроім і падсмажым на рапсавым масле. Дадамо старкаваную моркву і патрымаем патэльню на агні яшчэ 3 хвілі. Гародніну памыем і разрэжам напалову. У баклажана вымем сярэдзіну (якую дробна пасячэм і высыплем на патэльню да цыбулі і морквы), з авакада дастанем костку, у памідора – насенне. У засмажку дадамо 5 лыжак смятаны, раней прыгатаваную кашу і добра перамяшаем, прыправім соллю, перцам і куркумай. Цяпер напоўнім гародніну фаршам. Наверх – некалькі кавалкаў мацарэлы. Запякаем хвілінаў 20–30, каб гародніна стала мяккая. Смачна есці адразу, а калі крыху застанецца, то можна ўзяць на працу.