ПАМАРАНЧАВАЯ ПОЛІЎКА З САЧЫЎКІ І МОРКВЫ


коўшык 117
СЫТНЫ СУП



Натхнілася я арыентальнымі супамі. Не ведаю чаму, але такія экзатычныя і вострыя, мне смакуюць найболей. Але можна іх зрабіць з таго, што ёсць пад рукой. Зусім не патрэбныя дарагія складнікі. Ды і дзе іх шукаць па ўсім горадзе... А тое, з чаго складаецца гэты суп, я мела ў лядоўні і на кухні. А вынік такі, што можна праглынуць язык...

патрэбна:
паўшклянкі чырвонай сачавіцы (сачыўкі)
2 вялікія морквы
кавалак караню салеры
цыбуля
зубок часныку
кмен
кумін зіра (рымскі кмен)
свежы імбір
вострая папрыка
куркума
соль
какосавы алей (можа быць любы іншы)

Каб падкрэсліць водары прыправаў у рондлі (без алею) падсмажваем па дробцы куркумы, папрыкі, зіры і кмену. Тым часам кроім цыбулю, сантыметр імбіру і зубок часныку, дадаем у рондаль разам з лыжкай алею і смажым пакуль цыбуля стане празрыстай. Моркву і салеру мыем, чысцім і кроім кубікамі, дадаем у рондаль. Хвілін 5 смажым. Сачыўку мыем і дадаем у рондаль. Заліваем вадой сантыметраў 5 над гароднінай. Гатуем да мяккасці (хвілін 15). Час ад часу правяраем ці сачавіца не «выпіла» усю ваду, тады даліваем яшчэ. Гатовы суп міксуем блэндарам. Падаем з лыжкай смятаны (ёгурту), арахісам і зелянінай. Смачна есці!






Comments

Popular Posts