МІГДАЛАВЫ ПІРОГ З ЯБЛЫКАМ І МОРКВАЙ
коўшык 22
РАЗАГРЭЕМ
ВОСЕНЬСКІ ВЕЧАР
У маім блогу
вельмі рэдка гасцююць пірагі і дэсерты. Хоць вельмі люблю пячы і з
задавальненнем ем, але здаровы глузд не дазваляе мне рабіць гэтага занадта
часта. А таму калі я ўсё ж наважваюся, то імкнуся, каб прысмакі былі як мага
здаравейшыя. І вось прыклад: пірог з мігдалавай мукой, вільготны ад яблык, –
цудоўнага морквавага колеру. Запрасі сяброўку і даставай тарку!
Патрэбна:
2 невялікія
морквы
3 яблыкі
4 яйкі
100 г
мяккага масла
100 г цукру
100 г
кукурузнай ці пшанічнай мукі
125 г мігдалу
паўлыжачкі
парашку для пячэння
Пачнем з мігдалу,
які напачатку трошкі падсмажым на патэльні (без тлушчу!), а потым рашуча змелем
у блэндары, ледзь не ў муку. Моркву памыем, паскрабем і дробна патаркуем, 1
яблык памыем, аблупім і адправім на бурачковую тарку. Увага, 2 яблыкі трэба
пакінуць для ўпрыгожання. Аддзелім бялкі ад жаўткоў. Жаўткі ўзаб’ем з 50 грамамі
цукру і маслам, якое можна дастаць з лядоўні загадзя, каб стала мяккае.
Муку прасеем
і змяшаем са змолатым мігдалам і парашком для пячэння. Патрошку дадамо ў жаўтковую
сумесь, працягваючы ўзбіваць. Калі маса стане аднародная, укінем старкаваныя
моркву і яблык. У асобнай місачцы ўзаб’ем бялкі з рэштай цукру – і далікатна ўліем
у цеста.
Падрыхтуем
форму (каля 25 см), выкладзем пергамінам. Гатовае цеста выліем у форму. Трэба выраўняць
паверхню і ўпрыгожыць. 2 яблычкі са скуркай пакроім тоненькімі лустачкамі, і гэтак,
як нашая фантазія падкажа, выкладзем на пірог. Пячы будзем прыкладна 45 хвілінаў.
Гатовы пірог можна пашмараваць сочывам з абрыкосаў. Спадзяюся, сяброўка паспела
прыйсці. Смачнага вечара!
Comments
Post a Comment