МАРЫНАВАНЫ ЛАСОСЬ У ЦЫТРЫНАВЫМ СОКУ

коўшык 14

НА СНЯДАНАК З САМАГА РАНКУ

Гэтую страву я падгледзела ў адной амерыканскай рэстарацыі. Яна зусім не тыповая для кухні Дзікага Захаду і сапраўды вельмі дыетычная, з прыемным свежым смакам. Падаецца з сырком кшталту “Філадэльфія” і тостамі. Некаторыя дадаюць кроп – але гэта на аматара. Можна ўзбагаціць каперсамі. Прапаноўваю базавы варыянт, калі будзе недастаткова – смела эксперыментуйце.

Цяпер гэта ўлюбёны сняданак майго мужа. Калі замарынаваць звечара, то раніцаю проста дастаеш з лядоўні – і гатова.

патрэбна:

300 г свежага ласося

1 цыбуліна

сок 2–3 цытрынаў

белы перац гарошкам

соль

Ласося творча парэжам на шматочкі. Цыбульку – паўколцамі. Цытрыны апарым кіпнем і выціснем сок. Сокам заліем рыбу і цыбулю, пасолім і дадамо перчык (у мяне была сумесь белага і чырвонага). Рыба мусіць правесці ў лядоўні прынамсі 12 гадзінаў. За гэты час яна зменіць колер на бледна-ружовы і пасябруе з цытрынай. Смачна есці!